Mangupa Di Naharoan Boru

MANGUPA DI NA HAROAN BORU


Di haroro ni PARUMAEN tarmasuk ma on godang ni roha, di masyarakat ADAT BATAK ANGKOLA, PADANG LAWAS, MANDAILING, dohot sude na mardatkon adat BATAK di Tapanuli Selatan.

Godang ni roha on, dibaen mangihutkon hamoraon ni sada sada halak i. Ia anggo halak na marharto na bahat, dibaen do sada godang ni rohana, nada on dilanglang pangusayang. Muda di halak na marsuada, ra doi sondat ni sarat sarupo poda. Harana di adat on pe, adong do horja na godang, adong horja panonga, songoni muse adong horja namenek. Sudena i mangihutkon lahanan/landasan ni harejo, horja si godang ni roha ido lahanan ni pangupa on adong do opat ragam :
Manuk
Hambeng (horbo janggut)
Horbo (na bontar)
Pira manuk

Sude na pangupa angkon jantan do jenis na. Jarupe songoni, ia anggo di namarhata adat, ingkon disi do ihut pira manuk na di hobolan dohot sirana. Harana pira manuk on do sude raja ni pangupa. Pira manuk sajope tola di jadi pangupa, Cuma nada pola ditahion tu hatobangon dohot harajaon di huta. Nada didokkon namangupa anggo na so disi dope ihut pira manuk na dihobolan.

Di son tapabibi tapabanjar ma jolo salaho mambaen godang ni roha; mangupa dohot marlahanan hambeng (horbo janggut). Pasahatkon pangupa on tu tondi dohot tu badan ni bayo pangoli dohot boru na dioli. Di son ikkon na hadir do :
Suhut sihabolonan
Kahanggi
Hombar suhut
Anak boru
Pisang rahut
Mora
Hatobangon
Harajaon
Orang kaya dohot namanjadi pimpinan adat (Juru pengantar kata, pangatak panyusun acara adat).