Hata Ni Kahanggi :

Ia bo ale tutu, sattabi sappulu sappulu noli marsattabi, hujujung do jari sappulu, pajongjong adat dohot ugari. Natutu mada i andung dohot holos ni suhut sihabolonan, taringot di lakka-lakka ni anak si nuan tunas ;
Na palagut luluk dohot simbora
Dongan ni timbako tali
Na paihut arsak ni roha
Manjalahi dongan satahi

Songonon ma ibana na paihut-ihutkon dalan, napahulu-hulu bondar, na paihut padan ni opputta na hinan, manjalaki dongan matobang, ia anggo hami kahanggi na, laing songon pandokkon ni uppama do da :

Naga-naga tu-tus
Naga-naga ni tomboman
Baga-baga ni patulus
Pasaut na diangan-angan

Poken di kayu laut
Torang ari di Tarlola
Baga-baga dipasaut
Ulang nian bagi mahua

Muda dapot di tikki na, sangape di masona, anso nian martoruk ni abara sude anak ni raja dohot anak ni namora, pasaut patuluskon, jana pasahat pasanggalkon tu tondi dohot badan ni si godang ni roha, tar botima da sahat ni hata sian hami barisan kahanggina, wassalamu 'alaikum wr wb....

(Mangupa di naharoan boru : Ch. Sutan Tinggi Barani Perkasa Alam)

Hata ni Suhut :
Sattabi sappulu, sappulu noli sattabi, di langit na hujujung, di tano na hujojahi. Parjolo au marsattabi appot adong nahurang lobi. Taradop tua sahala ni anak ni raja-raja dohot anak ni namora-mora. Sumurung lobi di raja i, ima raja panusunan bulung, haruaya parsilaungan, banir paronding ondingan, namalo sumambut lidung, patama nadiangan-angan. Dison sumurdu burangir nami, ima burangir sirara huduk, sibottar adop-adop, dalan margalas marbisuk, paboahon nadung dapot. Ima burangir nahombang dua sarakkap, anso hombang tahi mardomu pokat.
Pangitean ni andung dohot lidung taradop anak ni raja-raja dohot anak ni na mora-mora di parsidangan namulia on. Ia anggo dalan ni sitta-sitta napalalu sigodang ni roha, ima salaho dilakka lakka ni anak si nuan tunas,

napatattan simanjojak,
napagayung si mangido,
lakka tu huta ni halak,
bagi adong rokkap marsuo.
Mankkail-kail siputtung,
mar sambil barapati,
mangadu adu uttung,
manjalahi dongan satahi.

Baen adong do na maribo ni roha, taringot di lakka-lakka ni anak,
na tandang marepal-epal,
na palagut luluk dohot simbora,
na mardalan marenggal-enggal,
manjalahi tumbuk ni roha.
Ima gadis na uli bulung,
si nuan boyu ni morana,
na malo sumambut lidung,
paihut roha ni anak namboru na.
Baen dung salose adat dohot ibadat na, taringot mada oppu api di niet, taradop anak lomo-lomo, tikki di partubu na, naro sian laut na so marombak, sareto godang ni roha ni kahanggi dohot sude di anak boru, di haroro ni parumaen ina panyunduti. Muda anak on simbur magodang, nakkan pajuguhon do di juluan, di jolo ni anak ni raja-raja, songoni dohot anak ni na mora-mora. Dalan manuktukkon, patidahon godang ni roha. On mada na diparsittahon, somba tu anak ni raja-raja, songoni dohot tu anak ni na mora-mora. Holos ni andung dohot lidung, anso saut dohot tulus, anso ulang jadi singotngot di bagasan ipon, tukkol di bagasan ngadol. Ia anggo lahanan ni harejo, napatidahon pangalaho, songoni dohot di tikki na, baen adong do i pahan pahanan ni anak ni raja, ima horbo janggut na dipagodang ni randorung, na ditambat-tambat di taruma. Songoni dohot ari na, suada ambat bikkolang, sanga pe bondul makkalang, muda natumbuk di anak ni raja-raja, ima di ari Sinayan, par poken ni halak Sidimpuan, salamat nian nadiangan-angan sareto diborkati tuhan. Baen dison dope kahanggi, tarlobi di anak boru na gogo marjujung, dipasahat dipatama hobar on maradop anak ni raja songoni anak ni na mora, botima.

(Mangupa di naharoan boru : CH. Sutan Tinggi Barani Perkasa Alam – Hal-6)

Bona ni Adat – Adat Sianjur na 23.

Na diputuskon di musyawarah (rapat) adat di huta bonabulu Sianjur, Sianjur mula toppa, Sianjur mula jadi, mula jadi ni adat raja-raja di Tano Batak. Pulo Marsada Roha na ni uluhon ni oppu i Nagalottung, Raja Batak nauppoppar Siregar ggelar Aji Guru Tunggul Panaluan Jati.

1. Bona ni adat na parjolo: Nada ajaran utte marduri, tubu utte tubu do duri na.Asa on ma na martulimbahon (arti dan maksudnya) tu daganak tubu. Muda tubu do daganak, diobansa do parrohaon dohot parange ni ama-ina na sanga oppuna sian bortian tu hasiangan di portibion. Muda nada denggan parange dohot parrohaon ni ama-ina sanga oppuna i, asa marroha na denggan, marparange na dengan ma ibana di portibion.
2. Asa bona ni adat na paduahon ima: Mata guru roha sisean.Asa on ma na martulimbahon tu daganak na dung togap-togap marmahan dohot daganak na dung mandoli, danak na dung sappe rudang, madung dibotosa rugi-labo, dohot markasayahon mata na marnida, markasayahon ate-ate na manimbangi aha na ni ida ni mata, aha na binege ni pinggol, aha na hilala ni badanna. Aha na denggan diparangehonsa, asa na jat diambungkonsa, labo diparayak rugi ditinggalkon.
3. Asa bona ni adat na patoluhon ima: Muda sikkam tukkona, laing sikkam do tunasna.Asa on ma na martulimbahon tu daganak na dung mandoli, na dung sappe rudang dipatobang adat matua bulung. Asa muda ama-ina sanga oppuna marroha dohot marparange na denggan, asa markasayahon mata dohot ate-ate mamboto rugi-labo, aha na jat dohot na denggan manurun do i tu popparanna.
4. Asa bona ni adat na pa opatna ima: Pattun hangoluan teas hamatean, tappal marsipagodangan, ulang sayat marsipaenehan.Asa on ma na martulimbahon tu pardomuan ni jolma manusia. Patttun marama-marina, pattun tu raja dohot guru, pattun ma tu sude jolma manusia, aso ro holon ni rohana, asa dapot denggan ni hangoluan. Asa muda teas tu ama-ina dohot tu raja asa guru, bo pe tu dongan jolma manusia, ro ma i jaya tu hamatean. Aso dipatama ma na tu dongan, asa dipatama dongan na tu iba, marsipata-tamaan. Asa ulang dibaen hancit ni roha ni jolma manusia aso ulang tubu roha na jat balosna.
5. Asa bona ni adat na palimahon ima: Marruhut pangkuling, marpopat panalaho, todas parjuguk, ulang jomak-jomak so marburi. Asa on ma na martulimbahon tu jolma manusia anso jolo dirohaan do sanga aha na didokkonna. Jolo marburi asa mangan, minum ulang manguga, asa modom di inganan na ias dohot na lapang, ulang songon hewan dipodomi na hodarna.
6. Asa bona ni adat na pa onomhon ima: Tappakna do rantosna, rim ni tahi do ogona. Gulang-ulang siala sappagul, rap tu ginjang rap tu toru.Asa on ma na martulimbahon tu jolma manusia asa rap sahaggogoan rap sahabeguan (begu – sumangot), marsiurup-urupan sanga aha karejo, hangoluan dohot hajuljulon dohot hasanggapon habadiaon. Asa rap sarugi salabo, rap sahasangapon, sahabadiaon, rap martua rap markaraton. Nada tola marsitading-tadingan.
7. On ma bona ni adat na pa pituhon ima: Satuptup satahi saluppat saindege, sapangambe sapanaili, sabile samalu.Asa on ma na martulimbahon tu jolma manusia, aso rap saroha sahata, satahi rap jujur, rap satia, sapangondot, sapandorgak, sahamatean sahangoluan, sahagabeon, sahamoraon, sahabilean, saparmaluan, saharugion saparlaboan.
8. On ma bona ni adat na pawaluhon ima: Takki do walang, si partahi na ulubalang, monang mangalo musu, talu mangalo dongan.Asa on ma na martulimbahon tu sifat ni raja dohot jolma manusia. Na gabe raja siparlaungan parkolip-kolipan ni rayat angkon si partahi hohot ulubalang na manjongjongkon adat dohot uhum dibagasan hajujuron na satia.
9. Bona ni adat na pa siahon ima: Tungkap-tungkap tu jolo, torjak-torjak tu pudi, jul-jul tu ginjang. Gonan gasa pado maripuk.Asa on ma na martulimbahon tu jolma manusia. Pattang ni anak raja, anak namora asa boru ni na mora, babere na mora mundur surut tu pudi, angkon na jul-jul tu ginjang, manjuljulkon adat dohot uhum dohot harajaon dohot hagabeon dohot hamoraon asa maginjang, magodang, marsangap martua markaraton, moncot sangakkip nai inggkon manyarbut di parmusuon. Tai anggo baen tu hasalamatan, gonan do mundur mangela surut marroha hajantanon pado mate dihabilean.
10. Asa bona ni adat na pa sappuluhon ima: Tola do marbada tai ulang diboan margotos. Asa sagodang-godang ni parbadaan ulang magotap panggantung parapian.Asa on ma na martulimbahon tu jolma manusia, nada tola marhosom na so sude di parbadaan. Asa sagodang-godang ni parbadaan ulang jabat dibuat hosa dohot dibaen gasa ni badan.
11. Asa bona ni adat na pa sappulu sadahon ima: Rukrek parau manjalak tu rapotna, dibaen pe martakkangi manjalahi hasintongan na dibagasan hapattunon.Asa on ma na martulimbahon tu jolma manusia dibagasan sanga aha na dipartakkakkon nada tola maroban tu segana, tai angkon maroban tu dalan manjalahi hasintongan do.
12. Bona ni adat na pa sappulu duahon ima: Pahulu simanggurak pahae sitippulon, muda sala dipandasoran sala ma dipambibiran.Asa on ma na martulimbahon tu jolma manusia angkon marsibalos-balosan do di hadengganan, asa na da tola baribaan songon na mangan dongdong. Asa muda sala dimukkana, laing sala do i di ujungna muda so dipauli. I ma anso taetae ulang porotan, manat-manat ulang tarsuga, asa sanga aha karejo jolo di rohaan tangkas-tangkas sanga bia pambaenna.
13. Asa bona ni adat na pa sappulu toluhon ima: Teas ni bulung so ni utusan, teas ni hata so ni alusan, teas ni adat so ni bulungan, teas ni raja so ni talagaan.Asa on ma na martulimbahon tu jola manusia. Nada tola teas tu saguman na niadokkon ni Allehewata Sombaon. Asa tanda na paradat paruhum dohot bulung pisang pe angkon ni utusan hodongna. Asa ulang teas mangalusi sapa-sapa, harana sapa-sapa na so ni alu2san maroban tu hancit ni roha. Na maol nada tarbaen jop ni roha ni halak, pinomat ulang dibaen hancit ni roha ni halak.
14. Asa bona ni adat na pa sappulu opatkon ima: Jayatonan dilakkai abara ulu, jaru pe di toru kihik pamorsanan, ulang mopop ulang tartuktuk, na hor hosa do puna teanan.Asa on ma ia le na martulimbahon tu jolma manusia, jayatonan do na ro muda dirappas anak harajaan dohot hasangapan ni amana, bope muda dirappas sianggian harajaan dohot hangasapan akkana. Asa ulang jolo mopop mangarappas, jaru pe ni rappas laing na hor hosa do i na teanan, asa songoni muse do i tu arta teanan, ulang dihalupahon ia sangap ni amana ima sangap ni anak, asa ia sangap ni akka, ima sangap ni anggi. Asa muda bile do ama nada arga hasangapon ni anak, asa muda bile siakkaan, nada arga hasangapon ni sianggian.
15. Asa bona ni adat na pa sappulu limahon ima: Batuk laho tu bagas, ehem laho tu sopo, barsi laho tu hauma, marbou laho tu tapian.Asa on ma na martulimbahon tu jolma manusia, jolo ni rohaan aha na giot sibaenon ulang ro panyolsolon tu pudi.
16. Asa bona ni adat na pa sappulu onomkon ima: Marga hapadasan, tutur mamikkolang, haskas bondul makkalang. Bada dibagas ulang di oban tu alaman.Asa on ma na martulimbahontu jolam manusia ankkon marruhut do sude pangalaho tarsinot tu na matua bulung na dipatobang adat, asa nada tola marsibuatan boru na sa marga dohot na marpareban dohot na mar lamere. Asa nada tola mar sibuatan boru jaru pe di marga mar hapadasan tai di tutur mamikkolang. Sanga ise mangalangar adat on ni dabu ma uhum tu ibana marutang marsomba tu harapatan adat, manombaon horbo mate mangolu. Asa nada tola palaluhon muruk ni roha diadopan ni halak na ni pattunan i ma so nidok haskas bondul makkalang. Asa bada na di bagasan bagas nada tola botoon ni halak na so patut mambotosa asa ulang maol paulion ni kahanggi dohot anak boru.
17. Asa on ma bona ni adat na pa sappulu pituhon ima: Na sega ni pauli, na tartar di jopput, na deret ni ulahan na mago dijalahan. Asa nada adong hata-hata na so sidung.Asa on ma na martulimbahon tu jolma manusia, nada tola dibaen jogal-jogal ni roha, jogal ni ate-ate. Asa halak namar salisi patureon ni kahanggina, dameon ni anak boru dohot morana. Hasidunganna patureon ni harapatan adat, ulang putung dohot siuk di pagodang-godang.
18. Asa bona ni adat na pa sappulu waluhon ima: Surat ni adat, sise ni adat siluluton, hombar lilit tu uhum sarak na dibaen ni Allahewata Sombaon. Asa on ma na martulimbahon tu jolma manusia. Ia so ni dok disise di adat siluluton, anke di adat siluluton ma tarida pardomuan ni jolma manusia, pardomuan ni suhut dohot morana, dohot kahanggina dohot anak boruna. Pardomuan ni raja dohot rayat, pardomuan ni suhut dohot mata ni ari sogajahon dohot sibuat babere asa pardomuan ni huta bona bulu dohot panusunanna. Asa ia pardomuan i tarida di parbagian juhut sosar ima na margoar juhut mulak bagian ni suhut dohot kahangina. Asa juhut rukkung bagian ni anak boru, asa tulang ritkan bagian ni mora dohot raja dohot suhut. Asa latcinok bagian ni raja dohot suhut asa torda bagian ni harajaon. Asa tok-tok bagian ni ripe-ripe, asa soit abara siamun bagian ni hula-hula battara kanan, asa soit abara kiri bagian ni bayo-bayo battara kiri. Asa mora ni mora marbagian sian mora ni suhut, asa bagian ni sibuat babere marbagian sian bagian ni anak boru, asa bayo ottangan na ni pattunan dapot bagian sian torda. Muda hurang torda na bagion, dibuat sian juhut mulak panambaina sodangna ulang enek roha ni ottangan.Asa panuppahi ni horja siluluton dohot siriaon pe laing songon adat parbagian juhut sosar i ma, tai marida-ida digualna dohot pokpokna. Asa parbagian ni rugi labo ni suhut dohot kahanggina marbai tolu i ma: dua bagi tu suhut sihabolonan, asa sabagi tu kahanggi. Asa parbagian ni rugi labo dohot anak boru, i ma na dua bagi di suhut sihabolonan dohot kahanggina asa sabagi tu anak boru.Songoni muse arta teanan ni anak dohot boru i ma: dua bagi di anak halaklahi, asa sabagi di anak boru. Asa muda sada anak halaklahi, sada anak dadaboru, rap dibagi dua dosdos be. Asa muda didok arta teanan i ma arta na taroban-oban songon pinahan, asa sere, asa perak, asa duit, asa abit ariari na so pakeon harajaon. Asa pakean dohot hiasan anak dadaboru margoar holong ate nada masuk bagian arta teanan. Asa anggo bagas dibagasan huta bona bulu dohot saba dohot ladang dohot hauma dohot kobun dohot tobat margoar arta adat i ma poko nada marbagian anak boru sian i.
19. Asa bona ni adat na pa sappulu siahon ima: Jumolo do siluluton ulang siriaon. Nada tarbaen marsiluluton anggo suada jolo marsiriaon. Anak pandorunan raja pakkolosan. Asa on ma na martulimbahon tu jolma manusia. Adat ni raja dohot na mora-mora, na da tola marhorja anggo adong hatinggalan lobong ni adat siluluton, i ma adat ni na mate angkon ni bulungan pinomat di lamlamkon. I ma sada horbo di juluan sada lombu di talaga. Anggo hum sada horbo disitcal di gora adat ni raja-raja na mora-mora dope i. I ma so nidok jumolu siluluton ulang siriaon, asa na da tola dipodomkon raja mate anggo suada jolo diangkat raja bulu aor na gabe gottina baen sitiop adat sidabu uhum. Asa na mangangkat raja i ma adat siriaon gorna. I ma so nidok nada tola baen marsiluluton angggo suada jolo marsiriaon. Asa nada targoar danak tubu, anggo suada jolo ni goar ama-inana. Asa muda manggoar anak, dipareso jolo sanga nadung margoar ama-inana. Asa muda nada podo margoar, asa di goar ma jolo ama-inana anso digoar anak. Di na mangupa anakna ima na nidok mandorum di anak.Asa muda halak na mian dibagasan pagaran dohot huta bona bulu, tano rura luat, muda parsuadaon tano parusahoan diholoskon tu raja huta bona bulu. Asa muda manguas di ginjang aek, male di ginjang jomur, diholoskon tu raja bona bulu parsilaungan, raja parkolip-kolipan.
20. Asa bona ni adat na pa duapuluhon ima: Adat dohot uhum ni raja, sipangan anak sipangan boru. Ise na sala ibana ma di uhum. Hosa tontangan ni hosa, tangan na sala tangan digotap, pat na sala pat digotap. Baba na sala baba ni sappal. Asa sidung do hata-hata adat muda tarjorang balanga sigupung di dalihan na tolu.Asa on ma na martulimbahon tu jolma manusia. Adat dohot uhum ni raja nada baribaan sonon na mangan dongdong, ise na sala ia ni uhum. Ise si parsala, ia mananggung hasalaanna. Asa nada diobankon di halak siparsala, hasalaan ni halak na asing.
21. Asa bona ni adat na pa duapulu sadahon ima: Halihi markuwok, une mangaluyun, tarsakkot di sige masuk bondul na opat.Asa on ma na martulimbahon tu jolma manusia. Muda raja-raja maruhum, nada tola halak ni uhum anggo suada tuk hatorangan dohot saksi. Asa tola ma halak ni uhum dohot dokdok muda adong hasaksian sian opat halak saksi na di haporsayaan dohot suppa.
22. Asa on ma adat na pa duapulu duahon ima: Raja sitiop adat sidabu uhum, tuan laon bolon si udut hosa, kahanggi dohot tumahi, mora sihurtuk tondi dohot tua ni anak boruna, asa anak boru pamittori.Asa on ma na martulimbahon tu jolam manusia. Raja na markuaso di huta bona bulu dohot pagaran na di tano banus, asa halak na taruhum na so unjung marsala, asa somalna halak na ni pattunan do di pangido tuan laon bolon di palua sian uhuman, sanga ulang mandalani uhuman dohot mamake parjanjian. Muda dibaensa hasalaan tu pudi ni ari, uhumanna i laing ditambahon tu uhuman parpudi. Asa muda raja martahi, dohot kahanggina do di tahihon. Asa pulu ni tahi dipaboa tu hula-hula battara kanan dohot di bayo-bayao battara kiri. Asa tahi ni halak na markahanggi disombahon tu mora ansa dihurtuk digobaksa tondi ni anak boruna na tumahi. Asa muda marsalisi halak na markahanggi, dipittori anak boruna anso sapanganan sapanginuman.
23. Asa bona ni adat na pa duapulu toluhon ima: Muda tading di huta bona bulu ni raja, akkon ni ihutkon do adat dohot uhum ni raja, na da tola maroban adat dohot uhum tu huta bona bulu na ni topotkon.Ima na digoaran Bona ni Adat – Adat Sianjur na diputuskon na di huta bona bulu Sianjur, Sianjur mula toppa, Sianjur mula jadi, mula jadi ni adat raja-raja di tano Batak, Pulo Marsada Roha na ni uluhon ni Oppu i Nagalottung Raja Batak na uppoppar Siregar gelar Aji Guru Tunggul Panaluan Jati.
    

MARTAHI

Pajongjong siulaon nasongonon, angkon di tahion do jolo, tu kahanggi koum sisolkot, tarlobi lobi tu dongan sahuta namangatur paradaton di huta i, ima hatobangon, harajaon, orang kaya dohot raja, saguman na di dokkon NATOBANG NATORAS di huta.

Muda dung pungu tahi ni na markoum markahanggi, ditontuon ma sada ari na denggan, palagut sude anak ni raja dohot anak ni namora, namangatur [aradaton di bagasan huta, mangido tahi anso dipasahat dipatulus, aha na tarsarkap di bagasan ni roha ni suhut sihabolonan. On ma na didokkon TAHI GODANG parsahutaon. Na hadir di partahian on, tarbagi dua kelompok ima SIPANDOKKON HATA dohot SIPANGALUSI HATA.
SIPANDOKKON HATA :
Suhut
Kahanggi
Hombar suhut
Anak boru
Pisang rahut
Mora

SIPANGALUSI HATA :
Hatobangon
Harajaon
Orang kaya
Raja (pimpinan adat)

Dison tabanjar majolo, salaho hobar di namartahi, pasahat harejo, horja mambaen sigodang ni roha MANGUPA DI NAHAROAN BORU, di jolo ni anak ni raja-raja dohot anak ni mora-mora.

(Mangupa di naharoan boru : CH. Sutan Tinggi Barani Perkasa alam)